Wasak

Sa totoo lang di ko alam kung pwede ko pang ihabol ang entry na to sa pakontest nila komski, pero dahil malakas ang fighting spirit ko, sige. Gagawa pa din ako.

Eto po ang opisyal na entry na nilahok ko sa

Kung kayo man ay naiyak, tumulo ang sipon o napahagulhol sa ikukwento ko, pakiboto na lang po ako dito E[Kwento]MO Entries Page. Mag iwan lang kayo ng komento dito at gumamit ng valid e-mail address para sa pag boto. Salamat!


Sa blog na ito di ko madalas nasasabi ang nasasaloob ko. Halos lahat kasi ng laman nito ay puro ngiti at tawa ang makikita nyo.
Pero sa totoo lang, samu't-saring problema at hinanakit ang dinadala ng enday na gumawa ng blog na ito.

Bata pa lang ako, alam ko ng di maganda ang mundong haharapin ko. Sa murang edad namulat na ako sa mga kapalpakang dala ng mundo.
Nasa limang taong gulang pa lang ata ako nung unang beses kong nakilala ang tinatawag nilang "magulong buhay".
Nasa kapitbahay ako nun, nanonoud ng t.v, (di ko na maalala ang palabas) Narinig kong sumisigaw ang daddy ko. Galit na galit. Sumilip ako sa screen ng pintuan namin.
Nakahiga si mommy sa sofa habang sinisigawan ni daddy. Minumura at sinisipa.
Umiyak ako, umiyak ako ng umiyak. Itinodo ko ang lakas ng pag ngawa ko.
Pati yung kapitbahay kong bata umiiyak na.
Nakita ako ni daddy at pinapasok sa loob. Di ko maintindihan ang mga nangyayari, at di ko na din maalala. Basta ang alam ko, nilapitan at niyakap ko si mommy hanggang sa nag dilim ang buo kong paligid.

Nang tumuntong ako sa elementarya, kahit paano ay umayos ang buhay namin. Nag abroad si daddy. Naiiwan akong mag isa sa bahay tuwing gabi dahil madaling araw pa lang nagtatrabaho na si mommy. Wala akong kapatid.
Pagkauwi ko sa eskwela magluluto ako ng kakainin ko, iikot lang sa instant noodles at palpak na itlog o tustadong hotdog ang ulam ko.
Gabi na ang uwi ni mommy, mga alas nwebe.
Bumalik si daddy matapos ang walong buwan. Maliban sa paminsan-minsang mura, binabatong nokia 3310, at sigawan sa bahay ay maayos naman kami.

Tumuntong ako ng highschool. Nag sara ang kompanyang pinag tatrabahuhan ni mommy, si daddy din walang trabaho. Naisipan nilang mag tinda ng ulam at ilang mga paninda.
Mula sa maliit at binubuhat na mga paninda at mesa para magmukhang tindahan ay nagkaron kami ng maayos ayos na karenderia.
Akala ko nadaanan ko na lahat ng mabibigat na problema sa mundo.
Mali pala ako.

Third year ako nun, nung magsimula kaming mag hanap ng kasama sa bahay.
May dinala si daddy at pinakilalang papasok saming katulong.
Maayos naman ang lahat, pero nag simulang mag hinala si mommy.
Nakikita nya daw na tsinatsansingan ng daddy ko yung katulong namin na 16yrs old pa lang noun. Pokpok pala yung babae, galing sa night club malapit samin.
Nung una di ako naniwala.
Lagi silang nag aaway tungkol dun. Inisip kong baka selosa lang talaga si mommy.
At sa muling pagkakataon, mali pala ako.
Kakatapos lang ng pasko nun, December 26. Naglilinis ako sa taas ng bahay namin.
Naiwan ko yung basahan sa baba kaya dahan dahan akong bumaba. May naririnig akong tawanan at hagikgikan. Tumambad sakin ang daddy ko at katulong naming nag bubulungan.
Bumilis ang tibok ng puso ko nun.
Di ko maipaliwanag.
Parang gustong kumawala ng puso ko sa dibdib ko.
Nag makaawa ang daddy ko na wag sasabihin kay mommy kung ayaw kong masira ang pamilya namin. Papatigilin daw nya ako sa pag aaral kapag nag sumbong ako.
Kinaladkad nya pa ko paakyat sa hagdan para di ako makapunta kay mommy.
Pero naging matatag ako.
Lakas loob kong sinabi kay mommy ang nakita ko.
Pinalayas sila at muntik ko ng durugin ang mukha at lagasin ang buhok ng katulong namin.
Lumipas ang ilang buwan, bumalik si daddy.
Nagmakaawa at pinatawad ng mommy ko.
Di ko sya inimikan ng ilang buwan.

Nag kaayos din naman kami.
Nag karoon ulit kami ng katulong.
Maayos naman ang lahat, maliban nitong 1st year college ako.
Kakatapos lang din ng pasko nun.
May relasyon na naman ang daddy ko at ang bago naming katulong.

Sa ngayon, wala ang daddy ko dito sa bahay.
Nag sampa na din ng kaso ang mommy ko sa korte.
Pumupunta lang ang daddy ko dito para kumuha ng ulam, damit o kaya pera.
Di ko alam kung gano kakapal ang sementong inilagay sa mukha ng tatay ko at nagagawa nya samin ang ganito.

Di na mabilang ang pinag daanan at pinag dadaanan ko sa buhay.
Di sapat ang isang post para ikwento ang lahat ng ito.
Pagod na din ako sa awang natatanggap ko.
Pagod na ko.